Bat egiten dugu Estatuko Garapenerako Erakundeen Koordinakundearen komunikatu honekin:
Joan den ekainaren 3an, Peruko Kongresuko Kanpo Harremanetarako Batzordeak aurreirizpena prestatu zuen, Nazioarteko Lankidetzarako Peruko Agentzia sortzeko Legea aldatzeko. Proposamen hori bi egun geroago onartu zuen Kanpo Harremanetarako Batzordeak, eztabaidarik gabe. Horrela, ekainaren 15a baino lehen bozkatzeko prest dago. Peruko eta Espainiako GKE-ek ohartarazi dute litekeena dela azkenean eztabaidarik gabe onartzea.
Proposamen horrek arriskuan jartzen du herrialdearen kalitate demokratikoa, elkartzeko eskubidea eta giza eskubideen defentsan, gizonen eta emakumeen arteko berdintasunaren alde edo ingurumenaren defentsan lan egiten duten nazioko eta nazioarteko erakundeen parte-hartzea mugatzen baititu.
Ekimena zehatz-mehatz aztertu ondoren, GKEak kezkatuta agertu dira “herrialdean gizarte zibilaren jardueraren kontrol politikoa indartu” nahi duten aldaketen aurrean. Salatu dutenez, “Legegilearen proposamenek GGKE-en bidez elkartzeko eta herritarrek parte hartzeko eskubidea mugatu nahi dute, neurrigabeko administrazio-zehapen arbitrarioak ezarri nahi dituzte, elkarte horiek bidezko arrazoirik eta prozesu egokirik gabe desegitea ahalbidetu nahi dute, eta biltzarkideen esku-hartze zuzena erraztu nahi dute, Gobernuari esklusiboki dagozkion eskumenetan, Nazioarteko Lankidetzarako Peruko Agentziaren bidez”.
Demokraziaren defentsa
Peruko GKEak adierazpen bat eta komunikazio kanpaina bat zabaltzen ari dira #CooperacionParaLaDemocracia lelopean, herrialdeko GKE sare nagusiek sinatua. Herrialdean dauden Espainiako garapenerako erakundeen sareak ere bat egin du ekimen horrekin.
Bertan salatu dutenez, “Errepublikaren Kongresuak nazioarteko lankidetzaren eta giza eskubideen, demokraziaren eta norbanakoen askatasunen defentsan lan egiten duten gizarte zibileko erakundeen aurkako erasoaldia abiarazi du, baita honako hauek lortzeko lan egiten dutenen aurka: berdintasuna, osasunerako eta kalitatezko hezkuntzarako sarbidea, ingurumenaren babesa eta berotze globalaren aurkako borroka, herritarren segurtasuna eta legez kanpoko jardueren aurkako borroka, adierazpen-askatasunaren defentsa eta ustelkeriaren aurkako borroka eta neskatoen aurkako indarkeriaren aurkako borrokaren aldeko aldaketak sustatzea, besteak beste”.
Perun lan egiten duten Estatuko Garapenerako Erakundeen Koordinakundeko GKE-ek eta Koordinakundeak berak bat egiten dute Peruko erakundeen alerta-ahotsarekin. Kalitate demokratikoa, gizarte zibilaren parte-hartzea gai publikoetan, elkartzeko eskubidea bermatu egin behar dira.
