Bilboko Lankidetzako Udal Kontseilua kontsulta, informazio eta parte-hartze instituzional, sozial, politiko eta hiritarreko organoa da, eta udalaren garapenerako lankidetza eta elkartasunerako politika definitzen du, eta horri jarraipena egiten dio. Egun, 57 GGKEk eta bost udal-talde politikoek osatzen dute organo hori.
Bilboko Lankidetzako Udal Kontseiluak 2024ko ekainaren 10ean egindako osoko bilkuran Gazaren aldeko honako adierazpen hau onartu du, Euskadiko GGKE-en Koordinakundeak proposatuta:
2023ko urritik ia 35.000 palestinar hil dira Gazako zerrendan Israelek egindako bonbardaketetan. Bi milioi pertsona baino gehiago daude ihesbiderik gabe harrapatuta. Ospitaleak, eskolak, errefuxiatu-eremuak eta Nazio Batuen eta GKEen instalazioak bonbardatzen ari dira, inpunitate osoz. Nazioarteko zuzenbide humanitarioa sistematikoki urratzen ari dira.
Urtarrilean, Nazioarteko Justizia Gorteak neurriak hartzeko agindu zion Israeli, Gazan genozidiorik gerta ez zedin. Lau hilabete geroago egoerak okerrera egin du. Bonbardaketak etengabeak dira eta gosea gerrako arma gisa erabiltzen ari dira; Nazio Batuetako zenbait agentziak inguru horretan aurrekaririk ez duen gosete-egoera dagoela salatu dute. Ospitaleak gainezka daude, biztanleen behar handiei erantzun ezinik, energiarik, material kirurgikorik edo botikarik gabe. Bien bitartean, laguntza humanitarioa duten kamioiak atxiki dituzte, eta Israelek ez die uzten inguruan sartzen. Egoera katastrofikoa da.
Israel Rafahn sartu izanak are gehiago okertu du muturreko giza krisia. Pasabide hori itxita dago, eta laguntza humanitarioa edo langile humanitarioak ezin dira sartu, ezta jendea bertatik atera ere. Erasoen ondorioz iparraldetik atera den populazioa hartu du Rafahk; horren ondorioz, hiriko populazioa 280.000 biztanletik 1.400.000 biztanlera igaro da. 200.000 pertsonak baino gehiagok ihes egin dute berriro, oraingoan Rafahtik. Zerrendan nonahi doazela ere, ez dute ihesbiderik, eta aurrekaririk gabeko giza hondamen bati egin behar diote aurre.
Zisjordanian ere nabarmen handitu da kolonoen eta Israelgo armadaren indarkeria. Nazioarteko hainbat erakunde eta organizaziok salatu dutenez, Zisjordania okupatuan eraso hilgarriak izan dira palestinarren aurka. Hona hemen Amnistia Internazionalaren Ekialde Hurbilerako eta Afrikako Iparralderako eskualde-zuzendari Heba Morayefen hitzak: “Kolonoek palestinarren aurka darabilten indarkeria izugarri areagotu da, eta estatuak babestutako hainbat urtetako kanpaina baten parte da, Zisjordania okupatuan, Eki Jerusalem barne, eta Israelen apartheid-sistemaren pean, palestinarrak ezer gabe uzteko, lekuz aldatzeko eta zapaltzeko.
Hori dela eta, Bilboko Lankidetza Kontseiluak hau adierazi nahi du:
- Premiazkoa da giza krisi larri hori eta giza eskubideen urraketa sistematikoa amaitzen lagunduko duten neurri guztiak hartzea. Premiazkoa da behar beste giza laguntzaren eta laguntza iraunkorraren sarbidea bermatzea.
- Bilboko herriari dei egiten diogu Palestinarekiko elkartasunean mobilizatzen jarraitzera eta duela zazpi hamarkadatik baino gehiagotik Israelgo estatua egiten ari den genozidioaren amaiera eskatzera. Horren aurrean, herri palestinarrak erresistentziarako eskubidea duela aldarrikatzen dugu, erregimen kolonial eta arrazista baten pean dagoen edozein herrik duen bezala, eta hori espresuki jasota dago NBEren Batzar Nagusiaren Ebazpenean, non gaur egungo Nazioarteko Zuzenbidearen egiturazko printzipioak biltzen diren; hain zuzen ere, erasoaren definizioa edota 1977ko Genevako Hiztarmenen Protokolo Gehigarria jasotzen diren ataletan. Beraz, sarraskia jasaten ari den herri honek erresistentziarako duen eskubidearen manipulazioari eta deslegitimazio- eta kriminalizazio-saioei aurre egitera deitzen dugu.
- Era berean, salatu nahi dugu Europa osoan Palestinarekiko elkartasunaren aurkako kriminalizazioa gertatzen ari dela zenbait neurriren bidez, hala nola manifestazioak debekatuta, Palestinako bandera eta beste sinbolo batzuk debekatuta edota elkartasun-erakundeak legez kanpo utzita.
Alde horretatik, Bilboko herriari dei egiten diogu:
- Estatuen eta gobernuen gaineko presioa areagotzera, Israel berehalako su-eten iraunkorra ezartzera behartzeko, eta Gazaren kontrako setioa amaitzera behartzeko, oinarrizko ondasunak eta zerbitzuak sar daitezen.
- Presioa handitzera, herritarrak Gazan eta Gazatik kanpo desplazatzera behartzen dituen edozein plan baztertu dadin.
- Espainiako Gobernuak eta Europar Batasuneko erakundeek Israeli bahitura militarra ezartzeko eskatzera, baita horien konplizitateari amaiera emateko beste zehapen batzuk eskatzera ere.
- Beharrezko neurriak har daitezela eskatzera, kontuak argitzeko prozesuak bultzatzeko eta Palestinan gehiegikeriak eta giza eskubideen urraketak jasan dituzten milioika pertsonei erreparazioa emateko.
- Europar Batasunari erantzun argi eta publikoa eskatzera, Palestinako Lurralde Okupatuetan lankidetza eta ekintza humanitarioaren sektorea kriminalizatzearen aurka, Europar Batasuneko Atzerri- eta Segurtasun-politikako goi-ordezkariaren eta Europako Batzordeko lehendakariorde Josep Borrell jaunaren bidez.
Bi milioi palestinarren baino gehiagoren bizitza dago jokoan, baita nazioarteko zuzenbide humanitarioa ere. Gizateriak ez du horrelako basakeriarik onartu behar.
Palestina Libre baten alde.
