Azaroaren 28an, Euskadiko GGKEen Koordinakundeak antolatutako Gasteiz Konexioan ekitaldiaren IX. edizioak munduarekin eta elkartasun globalarekin lotu zituen gasteiztarrak, Palestinako eta Mendebaldeko Saharako lurralde okupatuen askatasunaren aldeko esperientzien eta borroken bidez.
Rosabel Argote kazetari, giza eskubideen aldeko ekintzaile eta UNRWA Euskadiren Arabako erreferentea izan zen Gasteiz Konexioan ekitaldiaren bederatzigarren edizioa aurkezteko arduraduna. Euskadiko GGKEen Koordinakundeak urtero Araban antolatutako ekitaldi nagusia Aldabeko gizarte etxeko ekitaldi-aretoan egin zen aurten ere.
Territorios ocupados: non daude giltzak? izenburupean, besteak beste, Nazha El Khalidi saharar kazetari, ekintzaile eta Équipe Média albiste-agentziaren sortzailearen eta Mohammad Farajallah Euskadin bizi den ekintzaile palestinarraren testigantzak entzun ziren.
Mendebaldeko Saharako eta Palestinako errealitateei eta borrokei buruzko testigantzez gain, ekitaldiak lurralde okupatuen egoerari erantzuteko Gasteiztik bultzatutako bi mobilizazio esperientzia ezagutzeko aukera ere izan zen: alde batetik, Oporrak Bakean ekimena, errefuxiatutako haur sahararrak udan hartzeko programa; eta, bestetik, BDZ Araba kanpaina, Palestinako herriaren alde Israelgo estatuari boikota, desinbertsioak eta zigorrak ezartzeko nazioarteko eskakizunarekin bat egiten duen mugimendua.
Halaber, publikoak La Basu rap abeslari bizkaitarraren emanaldiaz gozatu ahal izan zuen. La Basu euskal eszenaren erreferentea da bere rap aldarrikatzaileagatik, eta, beste gai askoren artean, feminismoaz, giza eskubideen aldeko borrokaz eta justizia sozialaz hitz egiten duten letrak sortzen ditu.
Jarduera eLankidetza – Lankidetzarako eta Elkartasunerako Euskal Agentziaren, Arabako Foru Aldundiaren eta Gasteizko Udalaren laguntzari esker egin ahal izan zen, baita urtero horren antolaketan parte hartzen duten Arabako GGKE guztiei esker ere.
