SETEMen Balio Faktoria ekofeminismora hurbilduko da Yayo Herreroren esku eta arteen bidez
Natura suntsitzen duen sistema batean bizi gara, giza gorputzak eta bizitzak biziki zapaltzen dituena. Kapitalismoaren eta patriarkatuaren arteko aliantzak espoliatzeko baliabide bihurtu dute lurra, eta emakumeak lan-indar ikusezin eta prekarizatu dituzte. Baina erresistentziak badaude. Historian zehar, kontinente guztietako emakumeek beren ahotsa altxatu eta gorputzak jarri dituzte planeta defendatzeko, beren lurraldeak babesteko eta zaintzan eta justizian oinarritutako bizi-eredua eraikitzeko. Ekofeminismoak gogorarazten digu ez dagoela justizia sozialik justizia ekologikorik gabe, eta mundu bidezkoago baten aldeko borrokan naturarekin eta gure artean dugun harremana berrirudikatu behar dela.
SETEMen Balio Faktorian, hausnarketarako eta ekintzarako gune bat ireki nahi dugu otsailean hainbat jardueraren bidez. Erreferente eta esperientzia eraldatzaileak izango ditugu, etorkizun bizigarri baten aldeko borrokan feminismoa eta ekologismoa nola uztartzen diren ulertzen lagunduko digutenak. Gasteizen, Bilbon, Donostian, Basaurin eta Getxon egingo diren jardueretan parte hartzera gonbidatzen zaitugu.
Tailerra: Bizitza artearen erdigunean
Artearen eta ekofeminismoaren arteko harremana eraldaketarako tresna indartsua da. Bizitza artearen erdigunean. Sorkuntza artistikoa eta ekofeminismoa tailer honetan ikusiko dugu, Encina Villanueva Lorenzana feminista eta genero ikuspegidun artean aditua denarekin batera. Sorkuntza artistikoa erresistentzia eta birsorkuntza ekintza bat izan daitekeela deskubrituko dugu, eta naturan eta naturari buruz lan egiten duten artista garaikideak ezagutuko ditugu: ingurunea eraldatuz, ingurumena babesteko edo konpontzeko esku hartuz eta komunitatea kontzientziatuz. Jarduera inspiratzaile hau otsailaren 22an izango da, larunbata, Gasteizko Landatxo Gizarte Etxean, eta izena eman behar da. Begiratu informazio gehiago eta eman izena hemen.
Irakurketa dramatizatua: Q-ars Teatreren Chipko
Q-ars Teatre konpainia katalanak Chipko mugimenduan murgiltzen gaituen irakurketa dramatizatua dakarkigu, historiako lehen borroka ekofeministetako bat izan dena. Chipko iluntasuna zeharkatzen duen bidaia argitsua da, eta itxaropena itzultzen digu emakume ausarten istorioen bidez. Zuhaitz-okupak, zuhaitz-besarkatzaileak, zuhaitz-landatzaileak… Denek arriskatu zuten bizia guztion onerako. Paradisua salbatzeko.
Obra honen irakurketa dramatizatura etortzera gonbidatzen zaituztegu Donostian (02/13 – 20:30), Gasteizen (02/14 – 18:30) eta Basaurin (02/15 – 19:00). Begiratu informazio gehiago eta lortu gonbidapena hemen.
Yayo Herrerorekin topaketa eta ikastaroa
Yayo Herrerok Balio Faktoria bisitatuko du berriro, Getxon topaketa ireki batekin eta Bilbon ekofeminismoan murgiltzen hasteko ikastaro batekin. Ekofeminismoa: bizitza, gorputza eta lurraldearen defentsa topaketan, Yayo Herrerok eta Dalila Arguetak, Hondurasko Giza Eskubideen eta lurraldearen defendatzaileak, borrokei, gorputzei eta lurraldeei buruz hitz egingo dute. Estraktibismoaren aurkako erresistentziak eta emakumeak planetaren lehen defentsa lerroan nola dauden ezagutuko dugu. Getxoko Gurari Etxean izango da, otsailaren 21ean, ostirala, 18:00etan. Sarrera librea da lekua bete arte.
Egun bat geroago, Yayo Herrerorekin Ekofeminismoa hasiberrientzat. Gure egunerokotasunean lurreratzeko gakoak eta tresnak ikastaroa izango dugu. Ezaguna egiten zaizu kontzeptua, baina ez dakizu nondik hasi? Prestakuntza-eguna izango da, eraldatzeko ahalmena ulertzeko eta praktikan jartzeko. Jarduera hau Ekologistak Martxan eta Sagarrak Ekologista Taldearekin batera antolatu dugu. Bilboko Ekoetxean izango da, larunbatean, hilaren 22an, 10:00etatik 19:00etara. Izena emateko epea beteta dago, baina hemen eman dezakezu izena itxaron-zerrendan.
Zalantzarik baduzu, kontsulta gaitzazu. Eta ez badituzu… zure zain gaude!