Euskadiko GGKE-en Koordinakundetik bat egin dugu Estatuko Garapenerako Erakundeen Koordinakundearen jakinarazpen honekin:
Palestina etengabe setiatu zutenetik urtebete bete denean, 41.000 pertsona baino gehiago hil dituzte, eta gatazka eskualdeko beste eremu batzuetara hedatzen ari den bitartean, Estatuko Garapenerako Erakundeen Koordinakundeko kide diren GKE-ek su-etena, laguntza humanitarioa bermatzea eta Israelekin armen merkataritza amaitzea eskatu dute berriro. Ordutik bahitutako pertsonak etxera itzultzea ere eskatzen dute.
GKE-ek alarma-oihu bat egin dute berriro. 41.500 pertsona baino gehiago hil dituzte. Bi milioi pertsona baino gehiago harrapatuta daude oraindik Gazako zerrendan, ihes egiteko aukerarik gabe, eta indarkeria-mailak areagotu egiten dira Zisjordanian, Jerusalem ekialdean barne. Palestinako egoerak ez du aurrekaririk: eskolak, ospitaleak eta errefuxiatuen eremuak bonbardatzen dira. Zifra historikoak gainditu dira kazetariei, osasun-langileei eta zibilei -bereziki, neskatoei eta mutikoei- egindako hilketetan, indarkeria-igoera hori hasi zenetik orain dela hamabi hilabete. Ura, elikagaiak edo sendagaiak eskuratzeko kontrola gerra-arma gisa erabiltzen da. Egoera hori palestinarren eskubideen eta bizitzaren aurkako eraso zuzena da, baita nazioarteko arau humanitarioen aurkako eraso zuzena ere.
Nazioarteko Justizia Gorteak Israeli agindu zion neurriak har zitzala luzamendurik gabe genozidioa saihesteko. NBEko Segurtasun Kontseiluak su-etena eta laguntza humanitarioa bermatzea eskatu zuen. Hori ez da bete; izan ere, guztiz kontrakoa: Israelek persona non grata izendatu du Antonio Guterres Nazio Batuen Erakundeko idazkaria; Gazako Zerrenda bonbardatu du su-etenik gabe, indarkeria mailak ugaritu egin dira Zisjordanian eta Jerusalem ekialdean; gainera, Siria eta Yemen bonbardatzen ari da, eta Libanoko hegoaldea inbaditu du, non ia 500 pertsona hil eta milioi bat baino gehiago etxetik atera behar izan dituzten. Eskualdeko egoera oso kezkagarria da eta ez du aurrekaririk. Iranek Israeli eraso dio, eta horrek arrisku larria dakar, biak potentzia nuklearrak baitira. Milioika pertsonentzat ondorioak kalkulaezinak dira, baita gizateria osoarentzat ere, giza eskubideen eta Nazioarteko Zuzenbide Humanitarioaren printzipioak zigorrik gabe eta sistematikoki urratzen ari direla ikusten baitute.
Hirugarren estatuen erantzukizuna
Egoeraren larritasuna hain da handia, ezen erantzukizuna hirugarren estatuei ere baitagokie. Joan den martxoan, legez besteko proposamen bat onartu zen Kongresuan, eta, bertan, Gobernuari eskatu zitzaion zenbait neurri har zitzala, inguru horretan bakea lortzen laguntzeko funtsezko bost puntuak biltzen zituztenak:
• Aldeei su-eten iraunkorra eskatzea.
• Gatazkako alderdiei eskatzea sarbide humanitario nahikoa eta iraunkorra ahalbidetzeko, bereziki Gazan.
• Nazioarteko Zuzenbide Humanitarioa eta giza eskubideak errespetatzeko eskatzea aldeei.
• Estatu espainiarraren eta Israelen arteko arma-merkataritza amaitzea.
• Gatazkari irtenbide negoziatua emateko lan egitea, bide guztietatik Ekialde Hurbilean indarkeria areagotzea prebenitzea barne, bide diplomatikoa lehenetsiz.
Mundu osoko gizarteek beste herrialde batzuetara hedatzen ari den sarraski honen amaiera eskatzen dute. Nazioarteko komunitateak, estatuek, ezin dute beste leku batera begiratu basakeria horren aurrean. Erantzukizuna ezinbestekoa da, eta neurri irmoak hartzea eskatzen du sortzen ari den giza sufrimendu izugarriarekin amaitzeko. Gaurko bakeari laguntzeak etorkizuneko bakea elikatuko du.
